Muxtar respublikada əhalinin keyfiyyətli tibbi xidmətlə təmin edilməsi diqqət mərkəzində saxlanılır. Yüksək ixtisaslı həkim briqadalarının mütəmadi olaraq rayonlarda humanitar tibbi aksiyalar keçirməsi də bunun göstəricisidir. Növbəti tibbi aksiya Şərur rayonunda keçirilib.
Naxçıvan Muxtar Respublika Xəstəxanasının Şərur rayon Mərkəzi Xəstəxanasında təşkil etdiyi tibbi aksiya 26 ixtisaslı həkim və tibbi heyətin iştirakı ilə keçirilib. Sakinlər ayrı-ayrılıqda nefroloq, nevropatoloq, oftalmoloq, kardioloq, travmatoloq, uroloq, lor, terapevt, cərrah və digər ixtisaslı həkimlər tərəfindən müayinə olunub, analizlər götürülüb. Hər hansı bir xəstəliyi aşkarlanan sakinə müalicələr təyin edilib.
Qaraciyər, öd kisəsi, böyrək, mədəaltı vəz və digər daxili orqanların müayinəsi üçün ultrasəs müayinələri aparılıb. Müayinə zamanı səhhətində problemlər aşkarlanan sakinlər cərrahi əməliyyat olunub. Gün ərzində davam edən tibbi aksiyada 259 sakin müayinə və müalicəyə cəlb olunub. 8 sakin üzərində cərrahi əməliyyat aparılıb.
