Təcili-Tibbi Yardım Şöbəsi

Naxçıvan Mərkəzi Xəstəxanasında Təcili Tibbi Yardım şöbəsi 9 çarpayı üçün nəzərdə tutulmuşdur. Təcili Tibbi Yardım şöbəsi xəstəxananın 1-ci mərtəbəsində yerləşir.

Naxçıvan Mərkəzi Xəstəxanasında Təcili Tibbi Yardım şöbəsi təcrübəli və çevik tibbi heyəti ilə birlikdə həftənin hər günü 24 saat boyunca hər növ təcili və ilkin tibbi yardım göstərir.

Şöbənin tibbi personalı təcili yardım və reanimasiyada illər boyu çalışmış və zəngin iş təcrübəsi əldə etmiş peşəkar həkim-mütəxəssislərdən ibarətdir.

Təcili Tibbi Yardım Şöbəsində çalışan həkimlərin əksəriyyəti ilk və təxirəsalınmaz yardım üzrə beynəlxalq sertifikatlara sahibdirlər.
Naxçıvan Mərkəzi Xəstəxanasında Təcili Tibbi Yardım şöbəsinin işi operativ xidmət istiqamətində təşkil olunub.

Gecə növbəsində həkimlərimiz baş vermiş hər hansı fövqəladə hadisə zamanı pasiyentin sağlamlığı uğrunda mübarizədə bütün kollektivin köməyindən faydalanır.

Naxçıvan Mərkəzi Xəstəxanasında Təcili Tibbi Yardım şöbəsinə gətirilən xəstələr ixtisaslı həkimlər tərəfindən müayinə olunur, ehtiyac olduqda tibbi müdaxilə edilir, lazım gəldikdə isə xəstəxananın digər şöbələrinə yönəldilir.

Müasir standartlara uyğun olaraq lazımı tibbi cihazlar və ləvazimatlarla təchiz olunmuş 3 ambulans maşını ilə hər an pasiyentlərə təcili tələb olunan hər cür tibbi xidmət göstərmək imkanımız var. 
TTYŞ-də həyata keçirilən bütün tibbi xidmət növləri haqqında xəstənin yaxınlarının məlumatlandırılması bizim əsas iş prinsiplərimizdəndir. Pasiyentimiz və onun  yaxınları ümumi vəziyyət, bununla əlaqədar tətbiq olunacaq prosedurlar haqda ətraflı məlumatlandırılır.  Göstərilən bütün tibbi xidmətlərin təyinatı və mahiyyəti barədə məlumatlar ətraflı şəkildə xəstəyə və onun yaxınlarına izah edilir. Hər iki tərəfin razılığı əsasında tibbi xidmət həyata keçirilir.